ဝက်ခြံအတွက်ဆောင်ရန်၊ ရှောင်ရန်

(ဝက်ခြံရောဂါအတွက်မှာကြားချက် အနှစ်ချုပ်)

၁။ နံနက်အိပ်ရာထ မျက်နှာသစ်လျှင် ဝက်ခြံကို ညှစ်ခြင်း၊ ကိုင်တွယ်ခြင်း မပြုလုပ်ရပါ။ လက်သည်းရှည်ဖြင့် ကိုင်တွယ်မိပါက ပိုဆိုးတတ်ပါ၍ လက်သည်းကို တိုတိုညှပ်ထားလျှင် ပိုကောင်းပါသည်။

၂။ မျက်နှာကို အဆီပြန်ခြင်း သက်သာစေရန်နှင့် ရောဂါများ ကင်းစင်စေရန် ဆပ်ပြာဖြင့် တစ်နေ့လျှင်သုံးကြိမ် မျက်နှာသစ် သန့်စင်ပေးပါ။

၃။ နံနက်ခင်းနေရောင်ခြည်တွင် တစ်နေ့ ၃၀ ခန့် လမ်းလျှောက်ခြင်း၊ လေ့ကျင့် ခန်း ပြုလုပ်ခြင်းတို့ကို လုပ်ပေးပါ။ နေ့လယ်ဘက် နေရောင်ခြည်ထဲ သွားလျှင် ခရမ်းလွန်ရောင်ခြည်နှင့် ထိတွေ့မ့မှ လျော့နည်းစေရန်၊ ထီး၊ ဦးထုပ် စသည်တို့ကို ဆောင်းထားသင့်သည်။

၄။ ရေများများသောက်ခြင်း၊ သဘာဝသစ်သီးဖျော်ရည် (ဥပမာ သံပရာရည်၊ လိမ္မော်ရည်၊ နာနတ်ရည်) များ တတ်နိုင်သ၍ သောက်ပေးပါ။

၅။ ထမင်းစားတိုင်း ဟင်းရွက်အစိမ်းတစ်မျိုးမျိုး စားဖြစ်အောင်ထည့်စားပါ။ မစားဖြစ်ပါက ကလိုရိုဖီးလ် ပါဝင်သော သဘာဝဆေးတစ်ခုခု ဥပမာ - ရေညှိစိမ်း (chlorella)၊ အာလ်ဖာဖာ (alfalfa)၊ ဂျုံမြက်နု (wheatgrass) ကြိုက်ရာ တစ်ခုခုကို နေ့စဉ်စားနိုင် ပါသည်။ 

၆။ အဝါရောင်ရှိသော သစ်သီးဥများ ဥပမာ သရက်သီး၊ ရွှေဖရုံသီး၊ ကန်စွန်းဥနီ၊ မုန်လာဥနီတို့တွင် ဘီယာတယ်ရိုတင်း ကြွယ်ဝစွာပါသဖြင့် တစ်ပတ်တွင် နှစ်ကြိမ်ခန့် အနည်းဆုံး စားပေးသင့်သည် အကယ်၍ မစားနိုင်ပါက ကယ်ရိုတင်း သို့မဟုတ် ကယ်ရိုတီနွိုက်ပါဝင်သော သဘာဝဆေးများကို မှီဝဲနိုင်ပါသည်။

၇။ အနီရောင်ရှိသော သစ်သီးများတွင် လိုက်ကိုပင်း (Lycopene) ကြွယ်ဝစွာ ပါသဖြင့် တစ်ပတ်လျှင် နှစ်ကြိမ်ခန့် စားသင့်ပါသည်။ ဥပမာ - ခရမ်းချဉ်သီး၊ ဖရဲသီး၊ စတော်ဘယ်ရီ၊ ဘယ်ရီသီးများ၊ စပျစ်သီး အနီများ။

၈။ သွပ်ဓာတ်များများပါဝင်သည့် အခွံမာအသီးများ၊ အစေ့အဆံများကိုလည်း အလျဉ်းသင့်သလို စားသင့်ပါသည်။

၉။ ခရိုမီယမ်ဓာတ်ကြွယ်ဝသည့် ကြက်သွန်နီ၊ ကြက်သွန်ဖြူ အာလူး စသည်တို့ကိုလည်း ဟင်းရံအဖြစ် မကြာမကြာ စားပေးသင့်သည်။

၁၀။ အိုင်အိုဒင်းဓာတ်ပါသော အစားအစာများဖြစ်သည့် ပင်လယ်စာ၊ ရေမှော်၊ ကျောက်ကျော စသည်တို့ကို ဝက်ခြံပေါက်နေစဉ် ရှောင်သင့်သည်။

၁၁။ အိမ်သုံးဆား အထူးသဖြင့် အိုင်အိုဒင်းဓာတ် ဖြည့်စွက်ထားသော ဆားကို ဝက်ခြံပေါက်နေစဉ် မစားသင့်ဘဲ ပျောက်မှသာ ပြန်စားသင့်ပါသည်။

၁၂။ စားသုံးဆီကို တတ်နိုင်သလောက် လျော့စားသင့်သည်။ အထူးသဖြင့် ပြည့်ဝဆီ များစွာပါဝင်သည့် စားအုန်းဆီနှင့် ဝက်သားကို အထူးရှောင်ကြဉ်သင့်သည်။

၁၃။ ငါးမျိုးစုံကို ကြိုက်သလောက်စားနိုင်သည်။ ငါးတွင်ပါသည့် အဆီသည် အိုမီဂါ ၃ (Omega 3) ဖြစ်၍ ဝက်ခြံရောဂါ ပျောက်ကင်းရေးအတွက် အထောက်အကူပြုပါတယ်။

၁၄။ နွားနို့နှင့် နို့ထွက်ပစ္စည်းများဖြစ်သည့် ထောပတ်၊ မလိုင်၊ ဒိန်ခဲ စသည်တို့ကို ဝက်ခြံပေါက်နေစဉ် ရှောင်သင့်သည်။ ပျောက်လျှင်ပြန်စားနိုင်သည်။

၁၅။ အချိုဓာတ်များသော သရေစာများ၊ အချိုရည်များကို ရှောင်သင့်သည်။

၁၆။ ဆီးချိုရောဂါသည်များ ဝက်ခြံပေါက်လျှင် ပို၍ ဆိုးဆိုးဝါးဝါးဖြစ်တတ်သဖြင့် ဆီးချိုရောဂါကို သေသေချာချာ ကုသမှု ခံယူသင့်သည်။ ဆီးချိုကို မထိန်းနိုင်လျှင် ဝက်ခြံမပျောက်သည့်အပြင် ပို၍ ဆိုးလာတတ်ပါသည်။

၁၇။ စိတ်ဖိစီးမှုကို တတ်နိုင်သလောက် လျှော့ရန်လိုသည်။ တရားထိုင်ခြင်းသည် များစွာအကျိုး ရှိပါသည်။

၁၈။ ကော်ဖီ၊ လက်ဘက်ရည် စသည့် ကဖင်း (caffeine) ဓာတ် များစွာပါသော အစားအသောက်များ သည် ဝက်ခြံကိုပိုမို ဆိုးဝါးစေနိုင်သဖြင့် ရှောင်သင့်သည်။ 

၁၉။ နိုင်ငံခြား ဝက်ခြံပျောက်ဆေးများ (လိမ်းဆေး၊ သောက်ဆေးအားလုံး) ကို အသုံးပြုမည်ဆိုပါက တတ်ကျွမ်းနားလည်သော ဆရာဝန်နှင့် တိုင်ပင်ပြီးမှသာ အသုံးပြုရန်နှင့် ညွှန်ကြားချက်အတိုင်း တိတိကျကျ လိုက်နာဆောင်ရွက်ရန် ဖြစ်သည်။

အထက်ဖော်ပြပါ အချက်များသည် ဝက်ခြံရောဂါ ကာကွယ်ရေးအတွက် ကုသရေးအတွက် အရေပါသော အချက်များ ဖြစ်ပါ၍ လိုက်နာကျင်သုံးခြင်းဖြင့် ဝက်ခြံရောဂါမှ ကင်းဝေးစေရန် ဆန္ဒပြုအပ်ပါသည်။

Healthcare.com.mm သင့်ကျန်းမာရေး စောင့်ရှောက်ပေး

Credit:
ဒေါက်တာခင်မောင်လွင် (FAME)